Twende toleo la 2/2020 linapatikana

‘Nimepata Mia kwa Mia’

Mara nyingi tunakutana na majaribu. Mengine yanatuletea matatizo makubwa au hata yanatukatisha tamaa. Umewahi kupita katika wakati mgumu namna hiyo? Uliweza kushinda? Ni vigumu kushinda kwa kutegemea nguvu zetu wenyewe, sivyo? Basi nikuambie, yupo mmoja mwenye nguvu ya kushinda kila jambo. Ukimtegemea anakupa kushinda mia kwa mia. Je, ni nani huyu?  Katika toleo hili utajifunza anavyotafuta kushinda. Kuna simulizi nzuri ya moja ya mifano yake inayothibitisha anataka kupata mia kwa mia. Utasoma pia habari za mmoja aliyepita katika changamoto kubwa, lakini hakukata tamaa wala kupotea, bali alisema, ‘Yote namtolea Yesu’, na Yesu alimsaidia kuwa mtumishi mzuri mwenye amani na kazi yake. 

Ninakukaribisha usome makala zote na ujifunze mambo mazuri ya kujenga imani yako. Nikuambie! Mwaka huu Rehema atatoa zawadi kwa watoto watakaojibu vizuri maswali katika uk.5 na 6. Tazama katika ukurasa wa nyuma wa gazeti jinsi unavyoweza kutuma majibu yako. Majibu yako yakiwa sahihi, una kura moja. Tarehe 31/3, 30/6, 30/9 na 31/12 Rehema atatoa kura 15, yaani, kila mara kuna washindi 15 watakaozawadiwa.